Hvert á byggðin að stefna?- Skipulagskostir 2050
Hversu mikla áherslu skal leggja á þéttingu byggðar í nýju aðalskipulagi? Á að leggja áherslu á byggðaþróun inn á við og styrkja miðborgina eða á áfram að skipuleggja hefðbundin úthverfi í útjaðrinum? Hvaða áhrif hefur það á byggðaþróun ef flugvöllur verður lagður af í Vatnsmýri? Og hvaða áhrif hefur það ef innanlandsflugvöllur verður áfram starfræktur í Vatnsmýrinni? Þetta eru lykil spurningar við endurskoðun aðalskipulagsins.
Vegna ofangreindra spurninga var ákveðið að móta þrjá kosti um byggðaþróun til ársins 2050, sem fela í sér ólíkar áherslur varðandi þéttleika byggðar og landnotkun á lykilsvæðum eins og Vatnsmýri og við Örfirisey. Gert er ráð fyrir að byggja þurfi um 30 þúsund íbúðir til ársins 2050. Um helmingur þessara íbúða er mögulegt að byggja á „þegar ráðstöfuðum svæðum“ sem skilgreind eru í svokölluðum grunnkosti; á svæðum eins og Úlfarsárdal, Geldinganesi, Elliðaárvogi og þéttingarreitum innan borgarinnar. Skipulagskostirnir þrír fela allir í sér grunnkostinn en gera ráð fyrir mismunandi staðsetningu þeirra íbúða sem ekki rúmast á hinum ráðstöfuðu svæðum. Skipulagskostur A leggur mesta áherslu á uppbyggingu á þéttingarsvæðum eða allt að 75% af heildaríbúðarþörf. Í skipulagskosti C snýst þetta við og um 75% af heildarfjölda íbúða byggist upp í úthverfunum. Skipulagskostur B gerir hinsvegar ráð fyrir jafnvægi í framboði á þéttingarsvæðum og úthverfum.
Með því að móta ólíka skipulagskosti er skapaður grundvöllur að einföldum samanburði og mati á umhverfisáhrifum byggðaþróunar til lengri tíma. Niðurstöðurnar eru lagðar til grundvallar við mótun tillögu að nýju aðalskipulagi; við mótun stefnu um landnotkun og þéttleika byggðar á einstökum svæðum.